مع ليلى

بداية معرفتي بحملة كلنا ليلى كانت من بدايتي مع التدوين في أكتوبر ألفين و ستة و كنت متخيل إنها حركة من حركات المساواة المعتادة لكن بعد معرفتي بمشاركي في الحملة من خلال متابعتي لمدوناتهم حسيت بالفرق و عرفت أد إيه الناس دي و مطالبها جديرة بالإحترام و مع دعوتي للمشاركة في الموسم التاني في أكتوبر اللي فات شاركت بدون تردد رغم إن مشاركتي ماتعدتش الإجابة عن الأسئلة المقترحة بس حسيت إني قربت شوية أكتر من تفهم الحملة المرة دي مدفوع للماشركة لأني بدأت مع إختلاطي بسوق العمل أسمع دعاوي كتير ممكن يكون مكانها القرن التاسع عشر. مثلا أسمع ناس بيتكلموا عن إزاي المرأة تشتغل من عدة جوانب غريبة زي مثلا الست مكانها الطبيعي هو البيت لأن الست اللي بتشتغل أكيد مهملة في بيتها أو إن ماينفعش الست تشتغل لأنها ماأوتيتش القوة المناسبة للعمل (!!) أو إن الست كائن مش مستقر (وهنا أنا بانقل كلام واحد بالنص) و عمرها نتيجة لإضطرابها النفسي (!!!) ما هاتأدي عمل بالكفاءة المطلوبة أو من داعي ديني بإعتبار إن وجود الإختلاط في الجامعة أو في العمل من دواعي الفتنة و مش هايخلي حد يركز في شغله أو في دراسته المهم إن لقيت إن معظم الكلام ده مردود عليه من خلال أمثلة لزميلات قابلناهم في الكلية أو في العمل و دكاترة درسولي في الجامعة -بإستثناء واحد بس و لو في قسم إتصالات عين شمس تبقى أكيد عرفتها (وش بيغمز للست أدري تحديدا)- و أمثلة حية كتير مش عايز أحول الكلام لمنحنى شخصي بس يمكن سبب من أسباب رفضي للكلام هو مثال حي قدامي للمرأة العاملة اللي هو أمي هي بتشتغل في جهة رقابية من ساعة ما إتخرجت و معروفة في إدارتها بإنها من أكفأ العاملين طول مدة عملها.
يمكن الأغرب من الإعتراض على العمل هو موقف كان حصل معايا هو إني كنت في الشغل في يوم فاضي و كان معايا رواية لدكتورة رضوى عاشور و واحد فضولي صمم إنه يعرف إسم الراوية و الكاتب و لقيته بيستغرب أوي من إن واحدة ست اللي مألفة الرواية و إعتبرها رواية (أي كلام) لأن أكيد واحدة ست ماعندهاش اللي تقوله و لاحظت ساعتها إن مش بس الإعتراض على العمل لأ ده إعتراض على الفكر كمان.
و في النهاية أحب أحيي كل ليلى قررت إنها تاخد موقف و تتطالب بحقها

لمتابعة المزيد